दिवे लावण्यापेक्षा आशेचा किरण दाखवला असता तर बरं झालं असतं- राज ठाकरे

दिवे लावण्यापेक्षा आशेचा किरण दाखवला असता तर बरं झालं असतं- राज ठाकरे

मुंबई:-(विशेष प्रतिनिधी)दिवे लावण्यापेक्षा पंतप्रधानांनी आशेचा किरण दाखवायला हवा होता, असं मत मनसे प्रमुख राज ठाकरे यांनी व्यक्त केलं. दिवे लावायला सांगण्याऐवजी त्यांनी लोकांना मार्गदर्शन केलं असतं, आपण देश म्हणून कुठे चाललो आहोत, याचा माहिती दिली असती तर बरं झालं असतं, असंही त्यांनी नमूद केलं. राज ठाकरे यांनी आज (शनिवार) राज्यातील जनतेशी संवाद साधला. त्यावेळी त्यांनी एकंदरीत परिस्थितीवर भाष्य केलं.

पंतप्रधान नरेंद्र मोदी यांनी देशाला संबोधित करताना रविवारी सर्वांना दिवे लावायला सांगितले. नाहीतरी आपण घरात बसून काय करणार असं म्हणत लोकं त्यांचं ऐकतीलही. हे सर्व सांगण्याऐवजी त्यांनी आपण देश म्हणून कुठे चाललो आहोत. उद्या काय घडणार याबाबत माहिती दिली असती तर लोकांना बरं वाटलं असतं. सध्या देशात जी संभ्रमावस्था आहे ती पदावर बसलेल्या लोकांनी दूर केली पाहिजे. आज ज्यांचं हातावर पोट आहे त्यांना काही समजत नाही, असं राज ठाकरे म्हणाले. यावेळी त्यांनी सर्वांना लॉकडाउन गांभीर्यानं घेण्याची विनंती केली.

सध्या प्रत्येक घरात एक डॉक्टर
सध्या प्रत्येक घरात एक डॉक्टर निर्माण झाला आहे. कोणी म्हणतं गोमुत्र प्या, कोणी म्हणतं हे खा, ते खा. पण दुसरीकडे पोलीस कर्मचारी, डॉक्टर, सफाई कामगार, शेतकरी हे आपला जीव धोक्यात घालून काम करत आहेत.परंतु लोकांना गंभीर्य येत नाही, असं राज ठाकरे यावेळी म्हणाले.